काठमाडौं– पूर्व–पश्चिम (महेन्द्र) राजमार्गअन्तर्गत नवलपरासी पूर्वको चालिसकिलो भन्ने ठाउँमा सडक अवरुद्ध हुँदा सयौं सवारीसाधनहरु अलपत्र परेका छन्।
सोमबार परेको अविरल वर्षाका कारण राजमार्ग फराकिलो पार्ने क्रममा बनाइएको डाइभर्सन भास्सिएकाले राजमार्ग अवरुद्ध भएको जिल्ला प्रहरी कार्यालय नवलपरासी पूर्वले जनाएको छ। वर्षासँगकै बाढीले मध्यविन्दु नगरपालिका–७ मा डाइभर्सन र कावासोती नगरपालिका–१६ चालिसकिलोमा रहेको डाइभर्सन बगाएको प्रहरीले जनाएको छ।
डाइभर्सन बगाएको ठाउँमा डोजर परिचालन गरी सम्याउने काम भइरहेको प्रहरीले जनाएको छ। बाटो खुल्न अझै केही समय लाग्ने भएकाले पूर्व–पश्चिम राजमार्ग भएर यात्रा गर्ने सवारीसाधनलाई वैकल्पिक बाटोको प्रयोग गर्न प्रहरीले अनुरोध गरेको छ।
पूर्वबाट पश्चिम जाने सवारीहरुले डण्डाबाट कोल्हुवा हुँदै अरुणखोलाको रुट प्रयोग गर्न प्रहरीको आग्रह छ। यस्तै, पश्चिमबाट पूर्व जाने सवारीहरुले चोरमारबाट हुप्सेकोट हुँदै डण्डा निस्कने रुटको प्रयोग गर्न प्रहरीले आग्रह गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।